ਦਿਵਯ ਜਯੋਤੀ ਜਾਗਰਤੀ ਸੰਸਥਾਨ ਵੱਲੋਂ ਨਕੋਦਰ ਸ਼ਹਿਰ ਵਿੱਚ ਭਗਵਾਨ ਸ਼ਿਵ ਕਥਾ ਦਾ ਆਯੋਜਨ 25 ਨਵੰਬਰ ਮੰਗਲਵਾਰ ਤੋਂ
ਅਨਿਲ ਐਰੀ
ਦਿਵਯ ਜਯੋਤੀ ਜਾਗਰਤੀ ਸੰਸਥਾਨ ਵੱਲੋਂ ਨਕੋਦਰ ਸ਼ਹਿਰ ਵਿੱਚ ਭਗਵਾਨ ਸ਼ਿਵ ਕਥਾ ਦਾ ਆਯੋਜਨ 25 ਨਵੰਬਰ ਮੰਗਲਵਾਰ ਤੋਂ
ਨਕੋਦਰ 24 ਨਵੰਬਰ
ਦਿਵਯ ਜਯੋਤੀ ਜਾਗਰਤੀ ਸੰਸਥਾਨ ਵੱਲੋਂ ਨਕੋਦਰ ਸ਼ਹਿਰ ਵਿੱਚ ਭਗਵਾਨ ਸ਼ਿਵ ਕਥਾ ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ। ਇਹ ਪੰਜ ਦਿਵਸੀ ਪ੍ਰੋਗਰਾਮ 25 ਤੋਂ 29 ਨਵੰਬਰ 2025 ਤੱਕ ਹਰ ਰੋਜ਼ ਸ਼ਾਮ 6:30 ਵਜੇ ਤੋਂ ਰਾਤ 9:30 ਵਜੇ ਤੱਕ ਧਰਮ ਅਰਥ ਮੰਦਰ ਸ਼ਿਵਾਲਾ ਕੁਟੀਆ ਲਾਲਾ ਸਦਾਨੰਦ ਜੀ ਭਲਾ, ਮੁਰਾਦਸ਼ਾਹ ਰੋਡ, ਨਕੋਦਰ ਵਿੱਚ ਹੋਵੇਗਾ। ਇਸ ਪਾਵਨ ਕਥਾ ਦਾ ਵਾਚਨ ਸ਼੍ਰੀ ਆਸ਼ੁਤੋਸ਼ ਮਹਾਰਾਜ ਜੀ ਦੀ ਸ਼ਿਸ਼ਿਆ, ਸਾਧਵੀ ਮਨਸਵਿਨੀ ਭਾਰਤੀ ਜੀ ਵੱਲੋਂ ਕੀਤਾ ਜਾਵੇਗਾ। ਇਸ ਦਿਵਯ ਆਯੋਜਨ ਦਾ ਮੁੱਖ ਉਦੇਸ਼ ਸਮਾਜ ਵਿੱਚ ਸ਼ਿਵ-ਤੱਤਵ—ਅਰਥਾਤ ਸ਼ਾਂਤੀ, ਸੰਯਮ, ਆਤਮਬੋਧ, ਧੀਰਜ ਅਤੇ ਕਲਿਆਣਕਾਰੀ ਦ੍ਰਿਸ਼ਟੀਕੋਣ—ਦਾ ਪ੍ਰਸਾਰ ਕਰਨਾ ਹੈ।
ਅੱਜ ਦੀ ਦੌੜ-ਭੱਜ ਅਤੇ ਮਾਨਸਿਕ ਤਣਾਵ ਭਰੀ ਜ਼ਿੰਦਗੀ ਵਿੱਚ ਇਹ ਕਥਾ ਭਗਤਾਂ ਲਈ ਆਤਮਾ ਨੂੰ ਸ਼ਾਂਤ ਕਰਨ, ਮਨ ਨੂੰ ਸਥਿਰ ਕਰਨ ਅਤੇ ਜੀਵਨ ਦੀ ਦਿਸ਼ਾ ਨੂੰ ਮੁੜ ਸਮਝਣ ਦਾ ਇੱਕ ਸੁਨੇਹਰੀ ਮੌਕਾ ਪ੍ਰਦਾਨ ਕਰੇਗੀ। ਕਥਾ ਰਾਹੀਂ ਭਗਵਾਨ ਸ਼ਿਵ ਦੇ ਜੀਵਨ-ਦਰਸ਼ਨ ਦਾ ਗਹਿਰਾ ਵਿਸ਼ਲੇਸ਼ਣ ਕੀਤਾ ਜਾਵੇਗਾ – ਕਿਵੇਂ ਸ਼ਿਵ ਵਿਨਾਸ਼ ਦੇ ਪ੍ਰਤੀਕ ਹੋ ਕੇ ਵੀ ਸ੍ਰਿਸ਼ਟੀ ਦੀ ਨੀਂਹ ਰੱਖਦੇ ਹਨ,ਕਿਵੇਂ ਵੈਰਾਗ ਦੇ ਵਿਚ ਕਰੁਣਾ ਅਤੇ ਤਪੱਸਿਆ ਦੇ ਅੰਦਰ ਪ੍ਰੇਮ ਦੀ ਨਿਰਮਲ ਧਾਰਾ ਵਹਿੰਦੀ ਹੈ। ਕਥਾ ਦੌਰਾਨ ਸੰਗਤ ਭਗਵਾਨ ਸ਼ਿਵ ਦੇ ਇਤਿਹਾਸਕ, ਦਾਰਸ਼ਨਿਕ ਅਤੇ ਆਧਿਆਤਮਿਕ ਰੂਪ ਨਾਲ ਜਾਣੂ ਹੋਣਗੇ। ਸਾਧਵੀ ਜੀ ਦੇ ਪ੍ਰੇਰਕ ਬਚਨਾਂ ਰਾਹੀਂ ਉਨ੍ਹਾਂ ਨੂੰ ਇਹ ਸਮਝਣ ਦਾ ਅਵਸਰ ਮਿਲੇਗਾ ਕਿ ਸ਼ਿਵ ਸਿਰਫ਼ ਇੱਕ ਦੇਵੀ-ਦੇਵਤਾ ਨਹੀਂ, ਸਗੋਂ ਜੀਵਨ ਜੀਊਣ ਦਾ ਇੱਕ ਅਨੋਖਾ ਮਾਰਗ ਹਨ, ਜੋ ਮਨੁੱਖ ਨੂੰ ਅੰਦਰੋਂ ਮਜ਼ਬੂਤ, ਸੰਤੁਲਿਤ ਅਤੇ ਸ਼ਾਂਤ ਬਣਾਉਂਦਾ ਹੈ। ਦਿਵਯ ਜਯੋਤੀ ਜਾਗ੍ਰਿਤੀ ਸੰਸਥਾਨ ਹਮੇਸ਼ਾਂ ਨੈਤਿਕ ਚੇਤਨਾ, ਨਸ਼ਾ-ਮੁਕਤੀ, ਆਤਮ-ਵਿਕਾਸ ਅਤੇ ਆਧਿਆਤਮਿਕ ਜਾਗਰੂਕਤਾ ਲਈ ਮਿਹਨਤ ਕਰਦਾ ਆਇਆ ਹੈ। ਇਸ ਪ੍ਰੋਗਰਾਮ ਰਾਹੀਂ ਸੰਸਥਾਨ ਦੀ ਕੋਸ਼ਿਸ਼ ਹੈ ਕਿ ਵੱਧ ਤੋਂ ਵੱਧ ਲੋਕ ਜੀਵਨ ਦੇ ਅਸਲ ਉਦੇਸ਼ ਨੂੰ ਸਮਝਣ ਅਤੇ ਆਤਮਿਕ ਉੱਨਤੀ ਵੱਲ ਅਗਰਸਰ ਹੋਣ। ਸੰਸਥਾਨ ਦਾ ਮੰਨਣਾ ਹੈ ਕਿ ਐਸੀਆਂ ਕਥਾਵਾਂ ਕੇਵਲ ਧਾਰਮਿਕ ਕਰਮਕਾਂਡ ਨਹੀਂ ਹੁੰਦੀਆਂ, ਬਲਕਿ ਸਮਾਜ ਨੂੰ ਜੋੜਣ, ਪਰਿਵਾਰਾਂ ਵਿੱਚ ਏਕਤਾ ਵਧਾਉਣ ਅਤੇ ਨੌਜਵਾਨਾਂ ਨੂੰ ਸਹੀ ਰਸਤਾ ਦਿਖਾਉਣ ਦਾ ਮਜ਼ਬੂਤ ਸਾਧਨ ਹੁੰਦੀਆਂ ਹਨ।ਸੰਸਥਾਨ ਨੇ ਨਕੋਦਰ ਦੇ ਸਾਰੇ ਸ਼ਰਧਾਲੂਆਂ, ਪਰਿਵਾਰਾਂ, ਨੌਜਵਾਨਾਂ ਅਤੇ ਵ੍ਰਿਧ ਨਾਗਰਿਕਾਂ ਨੂੰ ਬੇਨਤੀ ਕੀਤੀ ਹੈ ਕਿ ਉਹ ਪਰਿਵਾਰ ਸਮੇਤ ਇਸ ਦਿਵਯ ਆਯੋਜਨ ਵਿੱਚ ਸ਼ਾਮਲ ਹੋਣ। ਤੁਹਾਡੀ ਉਪਸਥਿਤੀ ਨਾ ਸਿਰਫ਼ ਪ੍ਰੋਗਰਾਮ ਦੀ ਸ਼ੋਭਾ ਵਧਾਏਗੀ, ਸਗੋਂ ਤੁਹਾਨੂੰ ਆਧਿਆਤਮਿਕ ਸ਼ਾਂਤੀ, ਸਕਾਰਾਤਮਕਤਾ ਅਤੇ ਮਨੋਬਲ ਦਾ ਅਨਮੋਲ ਅਨੁਭਵ ਵੀ ਪ੍ਰਦਾਨ ਕਰੇਗੀ।
